There Is No

15.2.16.4.

Čájáhusat

Upcoming:

I Craft, I Travel Light

Upcoming: 29.04.201708.10.2017

Ođđasat

Sámi Dáiddamusea lea rabas!

Viimmat lea Sámis, Norggas ja máilmmis musea mii lea oamastahttojuvvon sámi dáidagii! 40 jagi aktivistarahčamušaid, oastimiid, šiehtadallamiid, lobbyismma ja nággárvuođa maŋŋá lávke dáiddamáilbmi ođđa áigái. Stuorra beaivi Sápmái. Stuorra beaivi Norgii. Stuorra beaivi máilbmái.

SDMX birra

Sámi Dáiddamusea birra

Sámi Dáiddamusea lea RiddoDuottarMuseat ja Davvi-Norgga dáiddamusea musea-performance.

Jagi 2017 galgá Davvi-Norgga Dáiddamusea jávkat guovtti mánnui. Dan sadjái boahtá hutkojuvvon ásahus. Davvi-Norgga dáiddamusea lanjat Sjøgata 1 dálus Romssas galget sihke fysalaččat ja sisdololaččat nuppástuhttojuvvot danin mii livččii sáhttit leat Sámi Dáiddamusea. Go Davvi-Norgga Dáiddamusea nuppástuvvá sihke siskkáldasat ja olgguldasat, de lonuhit dát guokte ásahusa perfomatiivvalaččat saji. Eará dáiddačoakkáldat biddjojuvvo sisa, ja museii addojuvvojit sierra gráfalaš identitehta, sierra gulahallanvuogádagat ja sierra museii guoskevaš áđat dego poastakoarttat, plakáhtat, visihttakoarttat ja máŋggalágan vuovdingálvvut.

Dainna lágiin dahkkojuvvo muhtunlágan molssaeavttot duohtavuohta. Dán molssaeavttot duohtavuođas rabai Sámi Dáiddamusea uvssaidis guovvamánu 15. beaivvi 2017 rahpančájáhusainis There Is No. Čájáhus fállá gehččiide válljejuvvon dáidagiid dan sámi dáiddačoakkáldagas mii lea RiddoDuottarMuseain Kárášjogas. Dan mielde lágiduvvo prográmma mas galget leat seminárat, bargobájit ja eará dutkanprošeavttat ja almmolaš lágideamit. Sámi Dáiddamusea jávká fas cuoŋománu 16. beaivvi 2017.

Dat jurdda ahte galggašii leat musea dušše sámi dáidaga várás, bohciidii 1970-logus ja joatkašuvai sámiid vuoigatvuođaid rahčamušaid oktavuođas ja daid joatkkaoassin. Plánat dan várás mii galggai šaddat Davvi-Norgga Dáiddamusean, bohte maid 1970-logus ja dat gulle soađi maŋŋásaš almmolaš boaittobeliid politihkkii. Davvi-Norgga Dáiddamusea ásahuvvui jagi 1985 ja rahppojuvvui álbmoga várás golbma jagi dan maŋŋá, jagi 1988. Dat dáiddamusea maid sámi dáiddabirrasat, museabirrasat ja servodat muđui leat vuorddašan, baicce ii leat vel duohtan dahkkojuvvon.

Musea-performancen Sámi Dáiddamusea árjjalaččat joatká dan ovddideami mii dán guovtti ásahusas lea leamaš. Dat iská mat museat leat, maid dat barget ja mo dat doibmet – sámi oktavuođas, norgalaš oktavuođas ja vel viidásat geahčadeamis. Dat lea árvalus ja cealkámuš dálá riikkalaš ja riikkaidgaskasaš digaštallamiidda našuvdnahuksema ja kulturpolitihka birra. Go olmmoš árvvoštallá Norgga 200-jagi ávvudeami iehčanas riikan jagi 2014 ja vuosttamus sámi riikkačoahkkima čuohtejagi ávvudeami Tråantes (Troanddimis) jagi 1917, de lea performance áibbas guovdil jagi 2017. Dan oktavuođas jearrá Sámi Dáiddamusea áibbas heivvolaččat ja lunddolaččat manne sámi dáidda váilu Norgga dáiddaásahusain, ja viidásat mearkkašumis, Norgga dáiddahistorjjás oppalaččat.

Dát ii leat duohta Sámi Dáiddamusea, dat lea baicce vejolaš Sámi Dáiddamusea.

Váldde oktavuođa

Sámi Dáiddamusea
Sjøgata 1
P.b.1009
9260 Romssa

(+47) 77 64 70 20
post@sdmx.no